ຄໍາຖາມ-ຄໍາຕອບຄົ້ນຄວ້າ

1. ໂລກະທັດແມ່ນຫຍັງ? ຈົ່ງໄຈ້ແຍກພາລະບົດບາດຂອງໂລກະທັດປັດຊະຍາມາກ - ເລນິນ?

1.1. ໂລກະທັດ: ແມ່ນລະບົບບັນດາທັດສະນະຂອງມະນຸດກ່ຽວກັບໂລກ, ກ່ຽວກັບຕົວມະນຸດເອງ, ກ່ຽວກັບການດໍາລົງຊີວິດ ແລະ ຈຸດຢືນຂອງມະນຸດໃນໂລກນັ້ນ, ໃນໂລກະທັດມີການປະສານລະຫວ່າງຄວາມສໍານຶກ ແລະ ຄວາມເຊື່ອຖື, ຄວາມສໍານຶກເປັນພື້ນຖານກໍາເນີດໂລກະທັດ ແຕ່ ມັນຈະເປັນສ່ວນໜຶ່ງຂອງໂລກະທັດ ກໍ່ຕໍ່ເມື່ອມັນເອງໄດ້ກາຍເປັນຄວາມເຊື່ອຖື, ເປັນແນວທາງໃຫ້ແກ່ການເຄື່ອນໄຫວຂອງມະນຸດ.
1.2. ໂລກະທັດປັດຊະຍາມາກ - ເລນິນມີບົດບາດ: ໃນການກໍານົດທິດທາງຢ່າງຖືກຕ້ອງໃຫ້ແກ່ການເຄື່ອນໄຫວ, ການຮັບຮູ້ ແລະ ການເຄື່ອນໄຫວພຶດຕິກໍາຂອງມະນຸດ ແລະ ຍັງສືບຕໍ່ເປັນປັດໃຈຊ່ວຍໃຫ້ມະນຸດຮັບຮູ້ໂລກອີກຕໍ່ໄປ.

2. ບັນຫາພື້ນຖານຂອງປັດຊະຍາແມ່ນຫຍັງ?

2.1. ບັນຫາພື້ນຖານຂອງປັດຊະຍາ ແມ່ນບັນຫາພື້ນຖານອັນຍິ່ງໃຫຍ່ຂອງທຸກໆປັດຊະຍາ, ພິເສດແມ່ນປັດຊະຍາທັນສະໄໝ, ເປັນບັນຫາ ກ່ຽວກັບການພົວພັນລະຫວ່າງແນວຄິດ ກັບ ການຄົງຕົວ.
2.2. ບັນຫາພື້ນຖານຂອງປັດຊະຍາ ມີ 2 ບັນຫາຄື:
- ລະຫວ່າງວັດຖຸ ແລະ ສະຕິອັນໃດມີ ກ່ອນ ອັນໃດມີ ຕາມຫຼັງ, ອັນໃດຕັດສິນອັນໃດ.
- ສະຕິຂອງຄົນເຮົາສາມາດສ່ອງແສງຕໍ່ການຄົງຕົວຂອງໂລກພາວະວິໄສໄດ້ ຫຼື ບໍ່.

3. ຈົ່ງອະທິບາຍສາຍພົວພັນສັດຈະວິພາກລະຫວ່າງວັດຖຸ ແລະ ສະຕິ?

3.1. ສະຕິແມ່ນຜະລິດຕະພັນຂອງສິ່ງວັດຖຸໜຶ່ງທີ່ມີການຈັດຕັ້ງສູງ, ນັ້ນຄືມັນສະໝອງຂອງຄົນເຮົາ.
3.2. ວັດຖຸເກີດກ່ອນ ແລະ ຕັດສິນສະຕິ, ສະຕິເກີດຕາມຫຼັງ ໃນເມື່ອເກີດຂຶ້ນແລ້ວ ໄດ້ມີການກະທົບຄືນຕໍ່ວັດຖຸໃນສອງດ້ານຄື:
- ດ້ານຕັ້ງໜ້າ: ເຮັດໃຫ້ສັງຄົມມີຄວາມກ້າວໜ້າ.
- ດ້ານຫຍໍ້ທໍ້: ເປັນການສະກັດກັ້ນການຂະຫຍາຍຕົວຂອງສັງຄົມ.
ຕົວຢ່າງ: ເມື່ອເຮົາເຫັນວັດຖຸໃດໜຶ່ງທີ່ງາມ, ເຮົາຕ້ອງຢາກໄດ້ ແລະ ສະຕິຂອງພວກເຮົາຕ້ອງຊອກຫາວິທີເອົາເງິນມາຊື້.

4. ຈົ່ງອະທິບາຍເນື້ອໃນຫຼັກມູນກ່ຽວກັບສາຍພົວພັນທົ່ວໄປ?

4.1. ສາຍພົວພັນທົ່ວໄປແມ່ນຄູ່ມາດຕະເກນຂອງປັດສະຍາໃຊ້ເພື່ອສະທ້ອນການກະທົບໄປມາເຊິ່ງກັນ ແລະ ກັນລະຫວ່າງບັນດາດ້ານຕ່າງກັນ, ບັນດາປະກົດການຂອງສິ່ງວັດຖຸ.
4.2. ສາຍພົວພັນແມ່ນຄູ່ມາດຕະເກນທີ່ ລວມບັນດາສາຍພົວພັນທີ່ມີໃນທໍາມະຊາດ, ສັງຄົມ ແລະ ໃນແນວຄິດ.
4.3. ສາຍພົວພັນຊີ້ໃຫ້ເຫັນການກະທົບໄປມາເຊິ່ງກັນ ແລະ ກັນ, ປະກົດການໜຶ່ງຂອງວັດຖຸປະກອບມີ ບັນດາດ້ານ, ບັນດາພາກສ່ວນ ທັງແຕກຕ່າງ, ເອກະລາດ ແລະ ທັງເປັນເອກະພາບກັນ, ມີການຜູກມັດກັນ ເພື່ອແນໃສ່ສ້າງສິ່ງວັດຖຸທີ່ສົມບູນ, ປະກົດການອັນແນ່ນອນ.

4.4. ສາຍພົວພັນທົ່ວໄປ, ປະກອບດ້ວຍ 4 ລັກສະນະຄື: ແຜ່ຫຼາຍທົ່ວໄປ, ພາວະວິໄສ, ຫຼາຍຮູບແບບ, ສະເພາະ ແລະ ເງື່ອນໄຂ.

ຕົວຢ່າງ: ເສດຖະກິດຂອງລາວ ຖ້າທຽບໃສ່ແມ່ນເສດຖະກິດຂອງຫວຽດນາມມີການກ້າວໜ້າກວ່າລາວ ແຕ່ວ່າຖ້າ ທຽບໃສ່ເສດຖະກິດຂອງໂລກແມ່ນເສດຖະກິດຂອງລາວ ແລະ ຫວຽດນາມແມ່ນກໍາລັງພັດທະນາ.

5. ຈົ່ງອະທິບາຍເນື້ອໃນຫຼັກມູນກ່ຽວກັບການຂະຫຍາຍຕົວ?

5.1. ແມ່ນຂະບວນການວິວັດເຄື່ອນເໜັງແຕ່ຕໍ່າ ຫາ ສູງ, ແຕ່ງ່າຍດາຍ ເຖິງ ສັບສົນ ແລະ ແຕ່ບໍ່ທັນສົມບູນ ເຖິງບ່ອນ ສົມບູນກວ່າ.
5.2. ການຂະຫຍາຍຕົວແມ່ນສິ່ງໃໝ່ ມາແທນທີ່ ສິ່ງເກົ່າ, ແຕ່ຍັງສືບຕໍ່ບົນພຶ້ນຖານດ້ານຕັ້ງໜ້າຂອງສິ່ງເກົ່າ, ປັບປຸງ, ພັດທະນາໃຫ້ມັນກາຍເປັນເງື່ອນໄຂໃຫ້ແກ່ການການພັດທະນາສິ່ງໃໝ່ໃຫ້ມີຄວາມໝັ້ນຄົງກ່ວາ.
5.3. ການຂະຫຍາຍຕົວເກີດຂຶ້ນຕາມເສັ້ນທາງກ້ຽວກົ້ນຫອຍ, ເບິ່ງຄ້າຍຄືວ່າກັບຄືນຈຸດເລີ່ມຕົ້ນ, ແຕ່ບົນພື້ນຖານສູງກວ່າເກົ່າ.
ຕົວຢ່າງ: ຄົນເຮົາເກີດຂຶ້ນມາແມ່ນມີການຂະຫຍາຍຕົວຂຶ້ນໄປຕາມຂະບວນການວິວັດເຊັ່ນວ່າ ມີເກີດແກ່ເຈັບຕາຍຕາມຂະບວນ ການວິວັດ.

6. ກົດເກນແມ່ນຫຍັງ? ຈົ່ງຍົກວິທີແບ່ງປະເພດກົດເກນ?

6.1. ກົດເກນແມ່ນສາຍພົວພັນທາງດ້ານທາດແທ້, ແນ່ນອນ, ມີແຜ່ຫຼາຍທົ່ວໄປ ແລະ ຊໍ້າໄປຊໍ້າມາ, ລະຫວ່າງບັນດາດ້ານ ແລະ ບັນດາ ປັດໄຈ, ບັນດາລັກສະນະປະຈໍາຕົວຢູ່ພາຍໃນແຕ່ລະສິ່ງວັດຖຸ ຫຼື ລະຫວ່າງບັນດາສິ່ງວັດຖຸດ້ວຍກັນ.
ຕົວຢ່າງ: ຄົນເຮົາເກີດຂຶ້ນມາ, ລ້ວນແລ້ວແຕ່ຜ່ານຂະບວນການວິວັດທາງດ້ານທາດແທ້, ແນ່ນອນ ແລະ ຊໍ້າໄປຊໍ້າມາ ມີລັກສະນະປະ ຈໍາຕົວຄື: ຄົນເຮົາຕ້ອງມີ ເກີດ, ແກ່, ເຈັບ, ຕາຍ...
6.2. ການແບ່ງປະເພດກົດເກນມີ 5 ປະເພດຄື:
1) ກົດເກນສະເພາະ: ມີລັກສະນະຈໍາເພາະພາຍໃນຕົວຂອງມັນເອງ.
2) ກົດເກນລວມ: ແມ່ນການກະທົບໄປມາໃສ່ກັນ.
3) ກົດເກນຢູ່ໃນຂົງເຂດສັງຄົມ: ແມ່ນມີການກະທົບລະຫວ່າງຄົນເຮົາກັບສັງຄົມ.
4) ກົດເກນທໍາມະຊາດ: ແມ່ນມັນເກີດຂຶ້ນເອງຕາມທໍາມະຊາດ.
5) ກົດເກນຈິນຕະນາການ: ແມ່ນກົດເກນແຫ່ງຄວາມສໍານຶກຂອງຄົນ.
6.3. ຄວາມຮັບຮູ້ຂອງຄົນກ່ຽວກັບກົດເກນແມ່ນປະກອບມີ 3 ກົດເກນຄື:
- ກົດເກນການປ່ຽນແປງທາງດ້ານປະລິມານພາໄປເຖິງການປ່ຽນແປງທາງດ້ານຄຸນນະພາບ.
- ກົດເກນເອກະພາບ ແລະ ການຕໍ່ສູ້ຂອງບັນດາດ້ານກົງກັນຂ້າມ.
- ກົດເກນປະຕິເສດຂອງການປະຕິເສດ.
ພຶດຕິກໍາຕົວຈິງ: ຕາມແນວທາງຂອງພັກປະຊາຊົນປະຕິວັດລາວຂອງພັກເຮົາ ຍຶດໝັ້ນລັດທິມາກເລນິນ, ແນວຄິດປະທານໄກ ສອນພົມວິຫານ ແລະ ມູນເຊື້ອຂອງພັກເປັນພື້ນຖານແນວຄິດທິດສະດີຂອງພັກເປັນເຂັມຊີ້ທິດໃຫ້ການຈັດຕັ້ງ ແລະ ການເຄື່ອນໄຫວ ຂອງພັກ.

7. ຈົ່ງອະທິບາຍກົດເກນ ຄວາມເປັນເອກະພາບ ແລະ ການຕໍ່ສູ້ຂອງບັນດາດ້ານກົງກັນຂ້າມ?

7.1. ບັນດາດ້ານກົງກັນຂ້າມແມ່ນບັນດາດ້ານທີ່ມີຈຸດພິເສດ, ມີລັກສະນະຈໍາເພາະ, ມີລັກສະນະ ທີ່ມີທ່າອ່ຽງ ເຄື່ອນເໜັງກົງກັນຂ້າມກັນ, ຄົງຕົວຢ່າງພາວະວິໄສໃນທໍາມະຊາດ, ສັງຄົມ, ແນວຄິດ ແລະ ແຜ່ຫຼາຍທົ່ວໄປໃນທຸກສິ່ງວັດຖຸ.
ດ້ານກົງກັນຂ້າມສັດຈະວິພາກແມ່ນການກະທົບໄປມາເຊິ່ງກັນ ແລະ ກັນຂອງບັນດາດ້ານກົງກັນຂ້າມ. ດ້ານກົງກັນຂ້າມສັດຈະວິພາກຄົງຕົວຢ່າງພາວະວິໄສ. ດ້ານກົງກັນຂ້າມສັດຈະວິພາກໃນແນວຄິດແມ່ນການສ່ອງແສງເຖິງການຮັບຮູ້ສະພາບຕົວຈິງ ແລະ ເກີດຈາກການຂະຫຍາຍຕົວຂອງແນວຄິດ.
ຄວາມເປັນເອກະພາບຂອງບັນດາດ້ານກົງກັນຂ້າມແມ່ນ ການອີງໃສ່ເຊິ່ງກັນ ແລະ ກັນ ເປັນເງື່ອນໄຂປະຖົມປັດໄຈ ໃຫ້ແກ່ການຄົງຕົວໃຫ້ແກ່ກັນ ແລະ ກັນ ບໍ່ມີດ້ານກົງກັນຂ້າມນີ້ ຈະບໍ່ມີດ້ານກົງກັນຂ້າມອື່ນ.
ສັງລວມ: ການຕໍ່ສູ້ຂອງບັນດາດ້ານກົງກັນຂ້າມແມ່ນການກະທົບເຊິ່ງກັນ ແລະ ກັນ, ການຈໍາກັດ, ປັດເປົ່າປະຕິເສດເຊິ່ງກັນ ແລະ ກັນ ຂອງບັນດາດ້ານນັ້ນ, ການຕໍ່ສູ້ຂອງບັນດາດ້ານກົງກັນຂ້າມ ປະກອບມີຫຼາຍຮູບແບບ, ຫຼາຍຮູບການໂດຍອີງໃສ່ທາດແທ້, ສາຍພົວພັນໄປມາລະຫວ່າງດ້ານກົງກັນຂ້າມ ແລະ ເງື່ອນໄຂເກີດຂຶ້ນຂອງການຕໍ່ສູ້.
* ສົມທຽບພຶກຕິກໍາຕົວຈິງ: ໃນອານະຄົດຕໍ່ຫນ້ານີ້ ສປປລາວ ມີຄວາມສາມາດ ເປັນຜູ້ຂາຍພະລັງງານໄຟຟ້າໃຫ້ບັນດາປະເທດອາຊຽນ.
7.2. ການແບ່ງປະເພດຂໍ້ຂັດແຍ່ງ, ມີ 4 ຂໍ້ຂັດແຍ່ງຄື:
- ຂໍ້ຂັດແຍ່ງພາຍໃນ ແລະ ຂໍ້ຂັດແຍ່ງພາຍນອກ.
- ຂໍ້ຂັດແຍ່ງພື້ນຖານ ແລະ ບໍ່ເປັນພື້ນຖານ.
- ຂໍ້ຂັດແຍ່ງຕົ້ນຕໍ ແລະ ບໍ່ເປັນຕົ້ນຕໍ.
- ຂໍ້ຂັດແຍ່ງປໍລະປັກ ແລະ ບໍ່ເປັນປໍລະປັກ.
ຕົວຢ່າງ: ຂໍ້ຂັດແຍ່ງລະຫວ່າງຕົວເມືອງກັບຊົນນະບົດ ເປັນພຽງບັນຫາຊົ່ວຄາວ ແລະ ສາມາດແກ້ໄຂໄດ້ໃນອະນາຄົດ.

8. ຈົ່ງອະທິບາຍກົດເກນການພົວພັນການຜະລິດ ສອດຄ່ອງກັບລະດັບການຂະຫຍາຍຕົວຂອງກໍາລັງການຜະລິດ?

8.1. ກໍາລັງການຜະລິດ ແລະ ການພົວພັນການຜະລິດ ແມ່ນສອງດ້ານຂອງຮູບແບບການຜະລິດ ມັນຄົງຕົວ ແລະ ບໍ່ສາມາດແຍກອອກຈາກກັນໄດ້ ແລະ ມີການກະທົບໄປມາ ຢ່າງສັດຈະວິພາກ, ສ້າງເປັນກົດເກນທີ່ເໝາະສົມຂອງການພົວພັນການຜະລິດ ກັບ ລະດັບການຂະຫຍາຍຕົວຂອງກໍາລັງການຜະລິດ...ເປັນກົດເກນພື້ນຖານ ຂອງການເຄື່ອນເໜັງ, ການຂະຫຍາຍຕົວຂອງສັງຄົມ.
* ກົດເກນການພົວພັນການຜະລິດ ສອດຄ່ອງກັບລະດັບການະຫຍາຍຕົວຂອງກໍາລັງການຜະລິດມີ 3 ກົດເກນຄື:
- ລະຫວ່າງກໍາລັງການຜະລິດ ແລະ ສາຍພົວພັນການຜະລິດ ແມ່ນສາຍພົວພັນພາວະວິໄສທີ່ມີມາແຕ່ເດີມຂອງທຸກຂະບວນການວິວັດແຫ່ງການຜະລິດວັດຖຸສິ່ງຂອງ.
- ກໍາລັງການຜະລິດເປັນອັນຕັດສິນການພົວພັນການຜະລິດ.
- ການກະທົບກັບຄືນຂອງການພົວພັນການຜະລິດຕໍ່ກັບກໍາລັງການຜະລິດ.
8.2. ເອົາໃຈໃສ່ປັບປຸງ ແລະ ກ້າວໄປສູ່ຄວາມສົມບູນໃນການພົວພັນການຜະລິດ, ເປັນຕົ້ນແມ່ນການປັບປຸງຍຸດທະສາດການຕະຫຼາດ. ກ່ຽວກັບກໍາມະສິດ ຕໍ່ພາຫະນະການຜະລິດ ແມ່ນຍັງຮັກສາການຂະຫຍາຍຕົວຕາມທິດຫຼາຍພາກສ່ວນກໍາມະສິດທີ່ແຕກຕ່າງກັນ ໂດຍມີການເຂົ້າຮ່ວມຂອງຫຼາຍພາກສ່ວນເສດຖະກິດ.

ເອົາໃຈໃສ່ຄຸ້ມຄອງເສດຖະກິດການຕະຫຼາດດ້ວຍກົດໝາຍ, ຍຸດທະສາດ, ແຜນນະໂຍບາຍ. ພ້ອມກັນນັ້ນຕ້ອງນໍາໃຊ້ຮູບແບບຄຸ້ມຄອງເສດຖະກິດໃຫ້ແທດເໝາະກັບສະພາບຕົວຈິງໃນແຕ່ລະໄລຍະ ເພື່ອເປັນການກະຕຸກຊຸກຍູ້ການຜະລິດ, ຜັນຂະຫຍາຍບັນດາດ້ານຕັ້ງໜ້າ ແລະ ແກ້ໄຂດ້ານຫຍໍ້ທໍ້ຕ່າງໆ.

9. ຈົ່ງອະທິບາຍທັດສະນະຂອງລັດທິວັດຖຸນິຍົມສັດຈະວິພາກກ່ຽວກັບບົດບາດພຶດຕິກໍາຕໍ່ກັບຄວາມຮັບຮູ້?

9.1. ຄວາມຮັບຮູ້ແມ່ນຂະບວນການວິວັດແຫ່ງການສ່ອງແສງຕັ້ງໜ້າ, ຕື່ນຕົວ ແລະ ປະດິດສ້າງໂລກໃສ່ມັນສະໝອງ ຂອງຄົນ ບົນພື້ນຖານພຶດຕິກໍາມີລັກສະນະຕົວຈິງ, ປະຫວັດສາດ - ສັງຄົມ.
9.2. ພຶດຕິກໍາແມ່ນການເຄື່ອນໄຫວທາງວັດຖຸທີ່ມີຈຸດປະສົງເປັນກົກເຄົ້າອັນພື້ນຖານ (ຕົ້ນກໍາເນີດ) ໃຫ້ແກ່ຄວາມຮັບຮູ້, ປະກອບມີ 3 ພຶດຕິກໍາຄື:
1. ພຶດຕິກໍາແມ່ນພື້ນຖານ, ກໍາລັງໜູນຂອງຄວາມຮັບຮູ້.
2. ພຶດຕິກໍາແມ່ນຈຸດປະສົງຂອງຄວາມຮັບຮູ້.
3. ພຶດຕິກໍາແມ່ນມາດຕະຖານເພື່ອກວດກາສັດຈະທໍາ.

* ສັງລວມ:

- ພຶດຕິກໍາ ຜະລິດວັດຖຸ ແລະ ປັບປ່ຽນໂລກ, ບັງຄັບໃຫ້ມະນຸດຕ້ອງມີຄວາມຮັບຮູ້ໂລກແຫ່ງການຂະຫຍາຍຕົວ.

- ພຶດຕິກໍາ ເຮັດໃຫ້ບັນດາກາຍອິນຊີສໍາພັດ ແລະ ຈິນຕະນາການຂອງມະນຸດຂະຫຍາຍຕົວສົມບູນຂຶ້ນເທື່ອລະກ້າວ, ຈາກນັ້ນຊ່ວຍໃຫ້ມະນຸດມີການຮັບຮູ້ໂລກນັບມື້ນັບເລິກເຊິ່ງ.

- ພຶດຕິກໍາ ແມ່ນມາດຕະຖານເພື່ອກວດກາຄວາມຮັບຮູ້ ຖືກ ຫຼື ຜິດ, ຖ້າການຮັບຮູ້ທີ່ຖືກຕ້ອງມັນຈະຊ່ວຍໃຫ້ພຶດຕິກໍາມີການພັດທະນາ ແລະ ກົງກັນຂ້າມ. ສະນັ້ນ ພຶດຕິກໍາຈິ່ງເປັນເຄື່ອງມືມາດຖານທີ່ສຸດໃນການກວດກາຄວາມຖືກຕ້ອງຂອງຄວາມຮັບຮູ້.

10. ຈົ່ງອະທິບາຍທາດແທ້ ໂຄງປະກອບຂອງສະຕິສັງຄົມ?

່10.1. ທາດແທ້ສະຕິສັງຄົມແມ່ນຮູບແບບທີ່ແຕກຕ່າງກັນຂອງຈັນຍາບັນໃນຊີວິດສັງຄົມ, ປະກອບດ້ວຍ: ແນວຄິດ, ທັດສະນະ, ສາຍຜູກພັນ, ອາລົມ, ຄວາມຊິ້ນເຄີຍ, ຮີດຄອງປະເພນີ, ມູນເຊື້ອ...ຂອງສັງຄົມ, ຖືກກໍາເນີດເກີດຂຶ້ນຜ່ານຂະບວນການຄົງຕົວຂອງສັງຄົມ ແລະ ສ່ອງແສງການຄົງຕົວດັ່ງກ່າວໃນແຕ່ລະໄລຍະປະຫວັດສາດອັນແນ່ນອນ.

10.2. ສະຕິສັງຄົມແມ່ນການສ່ອງແສງການຄົງຕົວຂອງສັງຄົມ, ຍ້ອນການຄົງຕົວຂອງສັງຄົມຕັດສິນ. ສະຕິສັງຄົມສ່ອງແສງການຄົງຕົວຂອງສັງຄົມດ້ວຍຫຼາຍຮູບແບບ, ມີລັກສະນະສັບສົນ, ຖືກຄອບງໍາດ້ວຍຫຼາຍປັດໄຈ (ຜົນປະໂຫຍດ, ສາຍຜູກພັນ...). ເມື່ອເງື່ອນໄຂຂອງສັງຄົມມີການປ່ຽນແປງບາງປັດໄຈ, ສະຕິສັງຄົມກໍ່ປ່ຽນແປງໄປນໍາ.

10.3. ທາດແທ້ໂຄງປະກອບຂອງສະຕິສັງຄົມ ມີ 5 ຮູບການຄື:
1. ສະຕິການເມືອງ: ແມ່ນຮູບຖານສະຕິສັງຄົມສອດຄ່ອງ ສ່ອງແສງບັນດາສາຍພົວພັນເສດຖະກິດ, ການເມືອງ, ສັງຄົມ, ຜົນປະໂຫຍດຂອງຊົນຊັ້ນ, ຖານະລະຫວ່າງຊົນຊັ້ນບັນດາຊາດ ຫຼື ລະຫວ່າງບັນດາປະເທດ ກໍ່ຄືທ່າທີຂອງບັນດາຊົນຊັ້ນຕໍ່ກັບອໍານາດ ແຫ່ງລັດຂອງສັງຄົມ, ສາມາດແຍກອອກໄດ້ 2 ສະຕິການເມືອງຄື: ສະຕິການເມືອງທໍາມະດາ ແລະ ລະບົບແນວຄິດການເມືອງ.
2. ສະຕິອໍານາດກົດຫມາຍ: ແມ່ນລະບົບບັນດາທັດສະນະຂອງຊົນຊັ້ນໜຶ່ ກ່ຽວກັບທາດແທ້ບົດບາດຂອງກົດໝາຍ, ກ່ຽວກັບຂອບເຂດສິດອໍານາດ, ພັນທະຂອງບັນດາສະມາຊິກໃນສັງຄົມຂອງລັດ, ບັນດາອົງການຈັດຕັ້ງສັງຄົມບົນພື້ນຖານບັນດາຫຼັກການທີ່ໄດ້ຮັບຮອງດ້ວຍກົດໝາຍ ແລະ ສັງຄົມ.
* ສະຕິອໍານາດກົດຫມາຍສະແດງອອກມີ 3 ເນື້ອໃນຄື:

- ທາດແທ້ບົດບາດກົດໝາຍ.

- ຂອບເຂດສິດອໍານາດ ແລະ ພັນທະຂອງສະມາຊິກໃນສັງຄົມ.

- ລັກສະນະຖືກຕ້ອງກົດໝາຍ ແລະ ບໍ່ຖືກຕ້ອງກົດໝາຍ ຫຼື ການກະທໍາຂອງສັງຄົມ.
ຕົວຢ່າງ: ກົດໝາຍວ່າດ້ວຍທະບຽນຄອບຄົວຢູ່ຫວຽດນາມແມ່ນຜູ້ຊາຍຕ້ອງມີອາຍຸ 20 ປີ, ສໍາລັບ ເພດຍິງ ອາຍຸ 18 ປີຂຶ້ນໄປຈຶ່ງ ສາມາດອອກທະບຽນໃຫ້ໄດ້.
3. ສະຕິຄຸນສົມບັດ: ແມ່ນທັງໝົດຂອງບັນດາທັດສະນະພູມປັນຍາ ແລະ ພາວະອາລົມຈິດ ມີລັກສະນະລວມຂອງບັນດາຊຸມຊົນກ່ຽວກັບບຸນ-ບາບ, ມະໂນທໍາຄວາມຮັບຜິດຊອບ, ຄວາມຜາສຸກ, ຄວາມຍຸຕິທໍາ ແລະ ອື່ນໆ.
4. ສະຕິສາສະໜາ: ແມ່ນບັນດາຈິດໃຈອາລົມຈິດທັດສະນະແນວຄິດຫຼັກການສາສະໜາ ສ່ອງແສງແບບເຫຼືອເຊື່ອ ເກີນຄວາມຈິງຂອງຊີວິດ, ຄວາມເປັນພາວະວິໄສການຄົງຕົວສັງຄົມສອດຄ່ອງກັບບັນດາຄວາມຕ້ອງການຈິດໃຈຂອງຄົນໃນເງື່ອນໄຂປະຫວັດສາດໃດໜຶ່ງທີ່ແນ່ນອນ.
5. ສະຕິຄວາມງາມ: ແມ່ນທັງໝົດຂອງຄວາມຮູ້ສຶກສະເທືອນໃຈ, ຄວາມນິຍົມ, ທັດສະນະອຸດົມຄະຕິ, ສ່ອງແສງສາຍພົວພັນ ຂອງຄົນຕໍ່ກັບຄວາມເປັນຈິງພາວະວິໄສ.
ຕົວຢ່າງ: ຜູ້ຊາຍເຮົາເຫັນຜູ້ຍິງງາມແລ້ວເຮັດໃຫ້ມີຄວາມຮູ້ສຶກຕື່ນເຕັ້ນ.