ໂດຍຕອບສະໜອງຕາມຄຳເຊີນຂອງທ່ານປະທານສະພາແຫ່ງຊາດ ລາວ ໄຊສົມພອນ ພົມວິຫານ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ນຳໜ້າຄະນະຜູ້ແທນຂັ້ນສູງສະພາແຫ່ງຊາດ ສາທາລະນະລັດ ສັງຄົມນິຍົມ ຫວຽດນາມ ໄປຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນ ລາວ ແຕ່ວັນທີ 15 – 17 ພຶດສະພາ 2022.
ນີ້ແມ່ນເຫດການສຳຄັນໃນປີສາມັກຄີມິດຕະພາບຫວຽດນາມ - ລາວ 2022, ແມ່ນການຢ້ຽມຢາມ ລາວ ຢ່າງເປັນທາງການຄັ້ງທຳອິດຂອງທ່ານ ເວືອງດິ່ງເຫວ້ ໃນຖານະເປັນປະທານສະພາແຫ່ງຊາດ, ພ້ອມທັງເປັນການຢ້ຽມຢາມຂອງຄະນະຜູ້ແທນຂັ້ນສູງສະພາແຫ່ງຊາດຕ່າງປະເທດຄັ້ງທຳອິດ ພາຍຫຼັງທີ່ ລາວ ໄດ້ຈັດຕັ້ງກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດ ລາວ ແລະ ກອງປະຊຸມສະໄໝສາມັນເທື່ອທີ 1 ຂອງສະພາແຫ່ງຊາດຊຸດທີ IX ຢ່າງສຳເລັດຜົນ.
ການຢ້ຽມຢາມ ລາວ ຢ່າງເປັນທາງການຂອງທ່ານປະທານສະພາແຫ່ງຊາດ ເວືອງດິ່ງເຫວ້ ໄດ້ປະຕິບັດໃນສະພາບການສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ສືບຕໍ່ຮັດແໜ້ນ ແລະ ພັດທະນາທີ່ສຳຄັນໃນທຸກຂົງເຂດ. ດ້ວຍຄວາມໃກ້ຊິດ ແລະ ຄວາມໄວ້ເນື້ອເຊື່ອໃຈທີ່ນັບມື້ນັບເພີ່ມຂຶ້ນ, 2 ປະເທດຮັກສາການຢ້ຽມຢາມ ແລະ ການພົວພັນດ້ວຍຫຼາຍຮູບຫຼາຍແບບທີ່ຜັນແປໄປໃນສະພາບໂລກລະບາດ. 2 ຝ່າຍຍັງຮັກສາບັນດາກົນໄກຮ່ວມມື, ໃນນັ້ນມີກອງປະຊຸມຄະນະກຳມະການລະຫວ່າງລັດຖະບານ ຫວຽດນາມ - ລາວ. ການຮ່ວມມືດ້ານຄວາມປອດໄພ-ປ້ອງກັນປະເທດແມ່ນເສົາຄ້ຳທີ່ສຳຄັນ. ຮ່ວມມືດ້ານເສດຖະກິດ, ວັດທະນະທຳ, ວິທະຍາສາດ-ເຕັກນິກ, ການສຶກສາ-ຝຶກອົບຮົມ, ການຮ່ວມມືໃນການປ້ອງກັນ ແລະ ຄວບຄຸມໂລກລະບາດໂຄວິດ-19, ເປັນຕົ້ນແມ່ນການຮ່ວມມືລະຫວ່າງບັນດາທ້ອງຖິ່ນ ລ້ວນແຕ່ໄດ້ຮັບການພັດທະນາຢ່າງຕັ້ງໜ້າ.
ການຮ່ວມມືລະຫວ່າງສະພາແຫ່ງຊາດສອງປະເທດສືບຕໍ່ໄດ້ຮັບການປັບປຸງ ແລະ ເພິ່ນທະວີ, ນັບມື້ເລິກເຊິ່ງກວ່າອີກ, ແທດຈິງ ແລະ ມີປະສິດທິຜົນ. ພ້ອມກັນນັ້ນ, ສອງຝ່າຍໄດ້ແລກປ່ຽນຫຼາຍປະສົບການທີ່ສຳຄັນໃນການສ້າງກົດໝາຍ ແລະ ຜັນຂະຫຍາຍບັນດາການເຄື່ອນໄຫວຮ່ວມມືຫຼາຍດ້ານ, ເຊັ່ນ: ການແລກປ່ຽນຄະນະຜູ້ແທນຂັ້ນສູງທຸກຂັ້ນຂອງສະພາແຫ່ງຊາດສອງປະເທດ, ຈັດຕັ້ງກອງປະຊຸມສຳມະນາ, ຊີ້ນຳປະຕິບັດບັນດາຂໍ້ຕົກລົງທີ່ໄດ້ລົງນາມລະຫວ່າງສອງປະເທດ. ສະພາແຫ່ງຊາດສອງປະເທດມີການສົມທົບກັນເປັນຢ່າງດີຢູ່ບັນດາເວທີປາໄສລັດຖະສະພາ ພາກພື້ນ ແລະ ສາກົນ. ພິເສດ, ສອງຝ່າຍໄດ້ສົມທົບກັນຢ່າງແໜ້ນແຟ້ນໃນການຜັນຂະຫຍາຍໂຄງການກໍ່ສ້າງຫໍສະພາແຫ່ງຊາດ ລາວ ຊຸດໃໝ່, ເຊິ່ງແມ່ນຂອງຂວັນຂອງພັກ, ລັດ ແລະ ປະຊາຊົນ ຫວຽດນາມ ທີ່ມອບໃຫ້ແກ່ພັກ, ລັດ ແລະ ປະຊາຊົນ ລາວ ແລະ ໄດ້ຮັບການເປີດນຳໃຊ້ໃນເດືອນ ສິງຫາ 2021.
ການຢ້ຽມຢາມ ລາວ ຢ່າງເປັນທາງການຂອງທ່ານປະທານສະພາແຫ່ງຊາດ ເວືອງດິ່ງເຫວ້ ສືບຕໍ່ຢືນຢັນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ທີ່ຍາມໃດກໍ່ໃຫ້ບຸລິມະສິດສູງສຸດ ແລະ ຖືເປັນສຳຄັນການພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ; ຢືນຢັນການສະໜັບສະໜູນຢ່າງແຂງແຮງ ແລະ ຮອບດ້ານຂອງ ຫວຽດນາມ ໃນພາລະກິດປ່ຽນໃໝ່, ກໍ່ສ້າງ ແລະ ພັດທະນາປະເທດ ລາວ, ປະກອບສ່ວນໜູນຊ່ວຍປະເທດ ລາວ ປະຕິບັດມະຕິກອງປະຊຸມໃຫຍ່ຜູ້ແທນປະຊາຊົນປະຕິວັດ ລາວ ຄັ້ງທີ XI ໃຫ້ສຳເລັດຜົນ ແລະ ແຜນການພັດທະນາເສດຖະກິດ - ສັງຄົມໃນໄລຍະ 2021-2025.
ຕ້ອນຮັບການເຂົ້າຢ້ຽມຂ່ຳນັບຂອງທ່ານປະທານສະພາແຫ່ງຊາດ ເວືອງດິ່ງເຫວ້ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ທີ່ມາຢ້ຽມຢາມຢ່າງເປັນທາງການ, ປະເທດເພື່ອນ ລາວ ເນັ້ນໜັກເຖິງຄວາມເຄົາລົບນັບຖື ແລະ ຄວາມໄວ້ເນື້ອເຊື່ອໃຈດ້ານການເມືອງເປັນພິເສດຂອງພັກ ແລະ ລັດລາວໃຫ້ແກ່ສາຍພົວພັນພິເສດ ລາວ-ຫວຽດນາມ; ປາດຖະໜາຢາກຊຸກຍູ້ການຮ່ວມມືຮອບດ້ານລະຫວ່າງ ລາວ ແລະ ຫວຽດນາມ ເພື່ອປະກອບສ່ວນປະຕິບັດແຜນພັດທະນາເສດຖະກິດ - ສັງຄົມຂອງ ລາວໃຫ້ສຳເລັດຜົນ
ການຢ້ຽມຢາມແມ່ນໂອກາດເພື່ອໃຫ້ການນຳສອງປະເທດຕີລາຄາໝາກຜົນການຮ່ວມມືລະຫວ່າງ ຫວຽດນາມ - ລາວ, ພິເສດແມ່ນລະຫວ່າງສະພາແຫ່ງຊາດສອງປະເທດ, ພ້ອມກັນປຶກສາຫາລືກ່ຽວກັບບັນດາທິດທາງຍົກສູງປະສິດທິຜົນການຮ່ວມມື, ຜັນຂະຫຍາຍບັນດາຂໍ້ຕົກລົງລະຫວ່າງການນຳຂັ້ນສູງຂອງສອງພັກ ແລະ ສອງລັດ, ພ້ອມທັງສັນຍາຮ່ວມມືລະຫວ່າງສອງສະພາແຫ່ງຊາດ. ສອງຝ່າຍໄດ້ແລກປ່ຽນທັດສະນະກ່ຽວກັບຫຼາຍບັນຫາຍຸດທະສາດພາກພື້ນທີ່ຕ່າງຝ່າຍຕ່າງມີຄວາມສົນໃຈ. ສອງປະເທດໄດ້ແລກປ່ຽນປະສົບການ ແລະ ປຶກສາຫາລືກ່ຽວກັບການເພີ່ມທະວີການຮ່ວມມື ແລະ ການສະໜັບສະໜູນເຊິ່ງກັນ ແລະ ກັນ ໃນການຕອບໂຕ້ພະຍາດໂຄວິດ-19, ການຟື້ນຟູ ແລະ ພັດທະນາເສດຖະກິດ - ສັງຄົມພາຍຫຼັງໂລກລະບາດ.
ປີ 2022 ແມ່ນປີສາມັກຄີ ມິດຕະພາບ ຫວຽດນາມ - ລາວ 2022 ໄດ້ຈັດຂຶ້ນໃນໂອກາດສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ, ເປັນຂີດໝາຍສຳຄັນທີ່ສຸດ, ສືບຕໍ່ເພີ່ມພູນຄູນສ້າງສາຍພົວພັນມິດຕະພາບພິເສດ ແລະ ຄວາມສາມັກຄີລະຫວ່າງສອງປະເທດ.
Lao Kip Calculator
